Foru ganberako osoko bilkurak hiru taldeen artean adostutako proposamen transakzionatua onartu du, sei hilabeteko epean PEAP eta PECEF prestazioen eraginari eta bilakaerari buruzko azterketa zorrotza egin dadin, prestazio-sisteman hobekuntzak txertatzeko helburuarekin
Gipuzkoako Foru Aldundiak azterketa sakona egingo du PEAP (Pertsonaleko Laguntzarako Prestazio Ekonomikoak) eta PECEF (Familia Ingurunean Zaintzarako Prestazio Ekonomikoa) prestazioen eraginari eta bilakaerari buruz, etxeko zaintzarako laguntza-sisteman hobekuntzak eta egokitzapenak egiteko asmoz; besteak beste, egungo zenbatekoak handitzea aztertuko da.
Hala eskatu dio gaur Gipuzkoako Batzar Nagusietako osoko bilkurak, Elkarrekin Podemosen eta Aldundia sostengatzen duten alderdien (EAJ eta PSE) artean adostutako proposamen bat onartu baitu, alderdi progresistak aurkeztutako jatorrizko ekimenetik abiatuta.
Onartutako zuzenketa transakzionatuak foru gobernuari eskatzen dio Gipuzkoan Mendekotasun Legearen baitako PEAP eta PECEF prestazioen eragina eta bilakaera aztertu eta ebaluatzeko, eta etorkizunerako proposamen bat txertatzeko, jasangarritasunaren eta ekitatearen printzipioak kontuan hartuta, Aldundiak artatutako gainerako kolektiboekiko harremanean. Proposamenak sei hilabeteko epea ezartzen du Aldundiak txosten hori foru ganberan aurkez dezan.
Elkarrekin Podemoseko bozeramaile Miren Echevestek defendatu du agerikoa dela etxeko zaintzaren arloan erabaki sakonagoak hartzeko analisi tekniko sakon bat izateko beharra. Ildo horretan, adierazi du laguntzen igoera “ezinbestekoa” dela, izan ere, azken urteotan haien zenbatekoa ez da bizi-kostuaren igoerarekin bat etorri, ezta Lanbidearteko Gutxieneko Soldatak (LGS) bizi-kostu handiago horri aurre egiteko izan dituen eguneratzeekin ere.
Izan ere, Gipuzkoako Batzar Nagusiek martxoan jada adierazi zuten Pertsonaleko Laguntzarako Prestazio Ekonomikoak handitzearen aldeko jarrera, prestazio horiek LGSarekin parekatzeko, Elkarrekin Podemosek sustatutako mozio bat onartu zenean. Jarrera hori hartu zen ondoren Araban Elkarrekin Podemosek Aldundiarekin akordioa lortu zuenean prestazio hori uztailetik aurrera LGSarekin parekatzeko (Arabako lurraldean prestazio horiek egungo 1.134 eurotik hilean 1.221 eurora igaroko dira, %7,6ko igoera suposatuz).
Echevestek azaldu du Gipuzkoako herritarren %85ek nahiago duela bere etxean zaindua izan ahal den denborarik luzeenean. Horregatik, azpimarratu du “jakina, funtsezkoa dela” Gipuzkoako Foru Aldundiak igoera hori gauzatzea, mendekotasuna duten pertsonen zaintza egokia bermatzeko beren familia-ingurunean. Baina -gaineratu du- beharrezkoa da etxeko zaintzarako laguntza-sisteman hobekuntza eta egokitzapen gehiago sartzea, pertsonak beren etxeetan ahalik eta denbora gehienean ondo zainduta egon daitezen bermatzeko, eta aldi berean zaintza-sistemako neurri guztien jasangarritasuna, eraginkortasuna eta efikazia bermatuko duten mekanismoak ezartzeko.
Horregatik -nabarmendu du- beharrezkoa da azterketa tekniko sakon hori egitea, eta sei hilabeteko epean Batzar Nagusietan aurkeztu beharko da, behar diren erabaki garrantzitsuak ahalik eta lasterren hartzeko. “Ezinbestekoa da gai honetan datuak argi eta garbi jasotzea, inplikatutako datu sozioekonomiko guztiak bildu, bi prestazioek zaintzaren arloan izan duten eta gaur egun duten eragina ebaluatu, 2023an egindako azken aldaketen ondoren, eta, batez ere, etorkizunerako proposamen bat lantzea”, adierazi du.
Echevestek espero du Aldundiak “ez duela azken egunera arte itxarongo, ezta Batzar Nagusiek ezarritako epea gaindituko ere” analisi tekniko zorrotza aurkezteko. “Zenbat eta lehenago izan informazioa, orduan eta lehenago eztabaidatu eta erabaki ahal izango ditugu pertsonaleko laguntzarako eta familia-ingurunean zaintzarako prestazio ekonomikoen etorkizunerako erabaki onenak”, ondorioztatu du.
PODEMOS Ahal Dugu
