Kritikatu du erantzun instituzionalaren atzerapena findegiko bentzeno-isuriaren aurrean, Bizkaiko Batzar Nagusietan izandako agerraldian; bertan, Elkarrekin Podemosen ekimenez, Natura Inguruneko diputatuak agerraldia egin du gertakari horren eta lau egun lehenagoko beste gorabehera baten berri emateko.
“Gertatutakoak alarma, haserrea, mesfidantza eta herritarren artean sentsazio oso argi bat eragin du: ordu batzuetan herritarren osasuna ez zela lehentasuna izan, eta hori ezin da normalizatu. Jendeak azalpenak baino gehiago merezi du; bermeak merezi ditu”
Ulertezintzat jo du Foru Aldundiak bentzeno-ihesaren berri komunikabideen bidez izan izana, Natura Inguruneko diputatuak berak aitortu duen bezala
Elkarrekin Podemos taldeko batzarkide eta Podemos Euskadiko koordinatzaile nagusi Richar Vaquerok gaur adierazi du Bizkaiko Foru Aldundiak exijentzia instituzional falta duela Petronor enpresaren jarduerarekiko, azkenaldian metatutako gorabeherek herritarren osasunerako arriskuak eragiten ari baitira. Halako gertakarien aurrean foru gobernuari dagokiona -adierazi duenez- “ez da soilik jarraipena egitea, baizik eta ekintza, exijentzia eta bermeak eskaintzea”, izan ere, “herritarren osasuna ez da negoziagarria”.
Hala salatu du Bizkaiko Batzar Nagusietan Natura Inguruneko eta Nekazaritzako diputatu Arantza Atutxak egindako agerraldiaren ondoren. Agerraldi hori Elkarrekin Podemos batzarkide-taldearen eskariz egin da, eta talde horrek premiaz eskatu zuen batzordean azaltzea joan den otsailaren 26an gertatutako bentzeno-isuriari buruz; isuri horrek Eusko Jaurlaritzari Muskizko bizilagunei konfinamendua gomendatzera behartu baitzu. Halaber, diputatuak azalpenak eman behar izan ditu -Elkarrekin Podemosen ekimenez, era berean- azken gorabehera hori baino lau egun lehenago gertatutako barneko akats elektrikoari buruz; akats horren ondorioz instalazioa tentsiorik gabe geratu zen, eta segurtasun-sistemak aktibatu ziren.
“Lehen gorabehera tekniko batetik benetako osasun publikoko larrialdi batera eta inpunitate korporatiboaren eskandalu batera igaro gara”, kritikatu du Vaquerok. Oso kritiko agertu da bentzeno-isuriaren ondorengo jarduera instituzionalarekin, erantzuna berandu iritsi zelako, eta horrek “herritarren artean gero eta zabalduago dagoen sentsazioa” eragin duelako: erakundeek ez dutela behar bezala babesten.
“Milaka pertsonak substantzia kantzerigenoen benetako esposizioa jasan dutela ari gara hizpide, akats teknikoak, informazio falta eta erabaki zalantzagarriak izan diren testuinguru batean. Gertatutakoak alarma soziala, haserrea, mesfidantza eta herritarren artean sentsazio oso argi bat eragin du: ordu batzuetan herritarren osasuna ez zela lehentasuna izan, eta hori ezin da normalizatu. Jendeak azalpenak baino gehiago merezi du; bermeak merezi ditu: berriro gertatuko ez dela bermatzea, bere osasuna edozein interes ekonomikoaren gainetik dagoela bermatzea, eta arrisku egoeretan garaiz jardungo dela bermatzea”, azpimarratu du.
Vaquerok gogorarazi du goiz osoan zehar bizilagunek usain biziak nabaritzen zituztela, eta arratsaldera arte ez zirela gomendioak helarazi. “Hau da, esposizioa jada gertatua zen. Eta hori agintariek beraiek ere aitortu dute. Bentzeno-maila altuak erregistratzen ari ziren bitartean, ez ziren sirenak aktibatu, ez zen behar bezala informatu ez herritarrak ez langileak, eta konfinamendua berandu iritsi zen”, kritikatu du.
Batzordean foru diputatuak emandako azalpenen ondoren, Richar Vaquero-k ulertezintzat jo du, Arantza Atutxa-k bere esku-hartzean aitortu duen bezala, foru gobernuak Petronor enpresan izandako bentzeno-ihesaren berri komunikabideen bidez izan izana. Era berean, kritikatu du Petronorren gorabeherak aztertzeko jarraipen-mahaiak -2016an Bizkaiko Batzar Nagusietan aho batez berraktibatzea onartu zenak- urte asko daramatzala bilerarik egin gabe. “Petronorri egiturazko neurriak eskatuko al zaizkio? Hurrengo gertakariaren zain jarraituko al dugu?”, salatu du Vaquerok, eta bentzeno-ihesaren ondoren gertatutakoagatik erantzukizunak eskatzea galdegin du.
PODEMOS Ahal Dugu
