Durangaldeko osasun-egoerari buruzko azterketaren emaitzak eskatu dizkio Elkarrekin Podemos-IUko Isabel Gonzalezek Eusko Jaurlaritzari
Isabel Gonzalezek, Elkarrekin Podemos-IUko legebiltzarkide durangarrak, Durangaldeko osasun egoerari buruzko informazio eskaera erregistratu du Eusko Legebiltzarrean. Zehazki, Barrualde-Galdakao ESIaren egoerari buruz Eusko Jaurlaritzak egindako azterlana eskatu du, “eskualdeko osasun-arretaren beharrak identifikatzeko, bai anbulatoriokoak bai ospitalekoak, zerbitzu-maila guztietan inplementatzea beharrezkoak diren beharrak, pertsona guztientzako kalitatezko osasun-zerbitzuen estaldura eta irisgarritasuna bermatze aldera”.
Otsailaren 17an, Elkarrekin Podemos-IUk proposatuta, Eusko Legebiltzarrean aho batez onartutako azterlana da. Ganberak eskualdeko osasun egoera aztertzeko eta konponbideak bilatzeko eskatu zion Eusko Jaurlaritzari. Ekimenean, legebiltzar taldeak Durangaldeko erakundeekin hitz egiteko eskatu zion Jaurlaritzari, “beren ekarpenak eta eskualdeko erakunde eta gizarte eragileek helarazi dizkietenak ezagutzeko”. Helburua eskualdeko errealitatea jasotzea eta eskualdeko errealitatera eta egoerara hobekien egokitzen diren neurrien proposamenak aurkeztu ahal izatea zen.
Elkarrekin Podemos-IUren ikuspegitik lorpen hori Durangalderako ospitale bat eraikitzeko lehen urrats gisa ikusi zuten. Izan ere, bere ekimena aurrera ateratzea lortu ondoren, Isabel Gonzalezek adierazi zuen azterlan horrekin ez dela “aitzakiarik” egongo “esku hartzeko eta Durangaldeko egoera zailari irtenbidea emateko”. Hala ere, urtea amaitzear dago, eta oraindik ez dago ebaluazio horren arrastorik. Horregatik, legebiltzarkideak berriro galdetu du gai horretaz eta azterlanari buruzko informazioa eskatu du.
Arreta eskasa eta urria
“Otsailean egindako osoko bilkura hartan esan nuen bezala, Durangaldeko biztanleak haserre eta atsekabetuta daude, eta ez dute ulertzen, urteetan kaleetan egindako protestak eta erakundeetara eramandako kexen ondoren, nola ez zaien erantzuik eman arazo horiei eta, bitartean, gure eskualdeko osasun-arreta gero esta eskasagoa eta urriagoa dela ikusten ari gara”, azaldu du Gonzalezek.
“Durangaldean eta Lea-Artibain 120.000 pertsona baino gehiago ari dira kalitate gutxiko osasun-arreta jasotzen”, adierazi du legebiltzarkideak, eta gogora ekarri du “lurraldeen araberako banaketa eta zuzkidurak” ez direla bidezkoak. “Gure beharrei erantzuteko azpiegitura eta baliabide nahikoak izan beharko genituzke”, azpimarratu du.
Koalizioak aspaldi jaso zituen Durangaldeko herritarren aldarrikapen guztiak, eskakizun horiek erakundeetan aurkezteko. Urteetan egin dituzten eskaerak dira, besteak beste: pediatra gehiago eta 24 orduko pediatria zerbitzua; lehen arreta indartzea, profesional gehiagorekin, ratioa jaitsiz eta lan-baldintzak hobetuz; etengabeko arreta guneak, EAG Etengabeko Arreta Guneak direlakoak; anbulantzia medikalizatua; erreferentziako ospitaleetarako garraiobide zuzenak; airearen kalitatea hobetzea; eta erronka demografikoari erantzutea; izan ere, gizartea zahartu ahala patologia gehiago sortzen dira, eta, beraz, arreta mediko handiagoa behar da.
PODEMOS Ahal Dugu
