Elkarrekin Podemosek Bizkaiko Batzar Nagusietan Natur Inguruneko eta Nekazaritzako foru diputatu Arantza Atutxaren presazko agerraldia eskatu du, Petronorreko findegian gertatutako azken istripuari buruzko azalpenak eman ditzan: atzo ostegunean bentzeno-ihes bat izan zen, eta horren ondorioz Eusko Jaurlaritzak Muskizko herritarrei etxean konfinatzeko gomendioa egin zien
Talde politikoak astelehen honetan bertan beste agerraldi-eskaera bat ere erregistratu zuen, foru diputatuak joan den igandean instalazioan gertatutako barneko akats elektrikoari buruzko azalpenak eman zitzan: Akats horrek instalazioa tentsiorik gabe utzi zuen, eta segurtasun-sistemak aktibatu ziren
“Gardentasun instituzional handiena eta herritarrek gertatutakoa, haren ondorioak eta hartutako neurriak xehetasunez ezagutzeko duten eskubidea bermatu behar dira”, adierazi du Richar Vaquerok
Elkarrekin Podemosek Natur Inguruneko eta Nekazaritzako foru diputatu Arantza Atutxaren presazko agerraldia eskatu du Bizkaiko Batzar Nagusietan, Petronorreko findegian gertatutako azken istripuaren berri eman dezan. Bentzeno-ihes horrek Eusko Jaurlaritzari Muskizko bizilagunei konfinamendua gomendatzera eraman zuen.
Batzarkide Richar Vaqueroren arabera, herritarrak konfinatzeko gomendioa garrantzi bereziko gertaera da, zuzenean eragiten baitie herritarren segurtasunari, osasunari eta konfiantzari. Hori dela eta, beharrezkoa da diputatua presaz agertzea, gertakari horren berri eman dezan eta, hala, gardentasun instituzional handiena eta herritarrek gertatutakoa, haren ondorioak eta hartutako neurriak xehetasunez ezagutzeko duten eskubidea bermatzeko.
Zehazki, Vaquerok galdera-sorta bat egin dio Atutxari, Bizkaiko Batzar Nagusietan ahalik eta lasterren erantzun ditzan:
• Noiz izan zuen gertakariaren berri ofiziala eta zein bideren bidez?
• Zer informazio jaso zuen ihesaren izaera zehatzari eta atzemandako bentzeno-mailari buruz?
• Zein koordinazio-mekanismo aktibatu ziren Eusko Jaurlaritzarekin, Muskizko Udalarekin eta gainerako agintari eskudunekin?
• Zer datu erregistratu zituzten lurralde historikoko airearen kalitatea neurtzeko estazioek gertakariak iraun zuen bitartean eta ondorengo orduetan?
• Indarrean dagoen araudiak ezarritako muga-balioak edo alerta-atalaseak gainditu al dira?
• Zer balorazio egiten du Foru Aldundiak osasun publikoarentzat eta natur ingurunearentzat izan daitekeen arriskuari buruz?
• Aurreikusi al da osasun- edo ingurumen-jarraipen espezifikorik egitea gertakariaren ondoren?
• Antzeko gertakariak berriro gerta ez daitezen, zer neurri zuzentzaile, ikuskapen-neurri edo protokoloen berrikuspen aurreikusten dira?
Vaquerok azpimarratu du instalazioa istripu larriei buruzko araudiaren eta Ingurumeneko Baimen Bateratuaren mende dagoela, eta, gertakariak Bizkaiko biztanleriari zuzenean eragin diola kontuan hartuta, ezinbestekoa dela Foru Aldundiak gertakari berri horri buruzko premiazko txostena egitea, herritarren artean susto handia eragin baitu.
Elkarrekin Podemoseko batzarkideak gogorarazi du Petronorreko Muskizko findegian hainbat gertakari izan direla azkenaldian; aurrekoa duela bost egun besterik ez, barneko akats elektriko baten ondorioz. Izan ere, astelehen honetan bertan Vaquerok diputatuaren agerraldia eskatu zuen igandean gertatutako barneko akats elektrikoari buruzko azalpenak eman zitzan. Hedatutako informazioen arabera, akats horrek instalazioa tentsiorik gabe utzi zuen eta segurtasun-sistemak aktibatu ziren. Halaber, inguruko hainbat udalerritako bizilagunek adierazi zuten kea eta usainak hainbat ordutan iraun zutela istripuaren ondoren.
Horrela, Elkarrekin Podemosek bi agerraldi-eskaera erregistratu ditu Bizkaiko Batzar Nagusietan, foru gobernuak Petronorren azken bi gertakarien inguruan informazioa eman dezan: bat, atzo plantako deposituetako batean gertatutako bentzeno-ihesari buruzkoa, gasolinaren lurrunketa eragin eta kea hainbat biztanlegunetara hedatu baitzen; eta bestea, joan den igandeko barneko akats elektrikoari buruzkoa.
PODEMOS Ahal Dugu
