Trump eta Netanyahu Donostian pertsona non grata izendatzea eskatu dugu

Victor Lasak adierazpen instituzionala erregistratu du Udalean, AEBek eta Israelek bultzatutako beste gerra baten hasiera gaitzesteko eta hiriaren konpromisoa berresteko nazioarteko zuzenbidearen, giza eskubideen eta biztanleria zibilaren babesaren alde

Donostiako Elkarrekin Podemosek eskatu du Udalak AEBetako presidente Donald J. Trump eta Israelgo lehen ministro Benjamin Netanyahu hirian pertsona non grata izendatzea, egungo gatazka-eskaladaren eta ondoriozko hondamendi humanitarioaren erantzule diren erabaki politiko eta militarrak bultzatu dituztelakoan.

Hala jasotzen da ostiral honetan bozeramaile Victor Lasak erregistratutako adierazpen instituzionalean, zeina Bozeramaileen Batzordean eztabaidatuko den. Hiru puntutan egituratutako testuak gaitzesten du Estatu Batuetako eta Israelgo gobernuek bultzatutako gerra berri baten hasiera, eta berresten du gure hiriaren konpromisoa nazioarteko zuzenbidearen, giza eskubideen eta edozein gatazka armatutan biztanleria zibilaren babesaren alde. Halaber, indar militarra erabiltzea eta giza bizitzen galera arinkeriaz tratatzen dituzten adierazpen publikoak arbuiatzen ditu.

Lasaren esanetan, Donostia hiri irekia, demokratikoa eta bakearekin konprometitua da; horregatik, beharrezkotzat jotzen du Udalak Trump eta Netanyahu pertsona non grata izendatzea, nazioarteko zuzenbidearen espirituaren aurkakoa den gerra berri bat abiatu dutelako. Esku-hartze militar horrek
-nabarmendu du- nazioarteko indarkeriaren gorakada larria eragin du, eta nabarmen handitu du dimentsio handiagoko gatazka baten arriskua, jada hamarkadetako tentsio eta gatazka armatuen ondorioz sakon markatutako eskualde batean.

Elkarrekin Podemoseko bozeramaileak azpimarratu du bereziki larria dela buruzagi politikoek indar militar desproportzionatuaren erabilera banalizatzea edo giza bizitzen galera arinkeriaz tratatzea. Ildo horretan, gogorarazi du Trumpek berriki mehatxu egin duela Irango biztanleria zibilaren aurka suntsipen handiko armak erabiltzearekin. “Ekintza horiek bateraezinak dira Udal honek defendatzen dituen bizitzarekiko eta giza duintasunarekiko errespetuaren balioekin”, adierazi du.

Adierazpen instituzionalaren edukian jasotzen denez, Benjamin Netanyahuk gidatutako gobernuak jarraitzen du neurri handiko hondamendi humanitarioa eragiten duen estrategia militar bat garatzen; estrategia hori behin eta berriz salatu dute nazioarteko legeria aplikatzen duten erakundeek eta nazioarteko komunitatearen gehiengo zabalak. “Bere ekintzak genozidio gisa ikertzen ari dira Nazioarteko Zigor Auzitegian, zeinak nazioarteko atxilotze-agindua eman baitu haren aurka”, adierazten da testuan.

“Donostiako Udalak historikoki defendatu ditu bakearen balioak, nazioarteko zuzenbidearekiko errespetua, biztanleria zibilaren babesa eta gatazken konponbide baketsua, herrien arteko bizikidetzaren oinarrizko printzipio gisa”, azpimarratu du Lasak; haren ustez, “ez litzateke ulertuko Udalak adierazpen instituzional hau babestuko ez balu”.