Gorrotoaren aurrean, guztiontzako eskubideak

Aurten, LGTBIQA+ pertsonak zeharkatzen dituzten gorrotoa eta indarkeria mota guztiak aitortu eta haien aurka egiten duen Harrotasuna aldarrikatzen dugu, bereziki matxismoarekin, arrazakeriarekin eta gizarte-bazterketarekin gurutzatzen direnean

MANIFESTUA E28 PODEMOS EUSKADI 2026

Ekainaren 28an LGTBIQA+ Harrotasunaren Nazioarteko Eguna ospatzen da. Egun hori aldarrikapenerako, memoriarako eta giza eskubideen defentsarako eguna da, eta milioika pertsonak sexu-orientazioagatik, genero-identitateagatik edo genero-adierazpenagatik jasandako diskriminazioaren, jazarpenaren eta indarkeriaren aurrean egindako borroka gogorarazten du.

Azken hamarkadetan lortutako aurrerapenek LGTBIQA+ pertsonen oinarrizko eskubide eta askatasunak nabarmen zabaldu dituzte. Lorpen horiek elkarte-mugimenduaren, mugimendu feministaren eta berdintasunaren alde konprometitutako erakunde ugariren lan etengabearen emaitza izan dira. Hala ere, aurrerapen horiek ez dira atzeraezinak, eta oraindik ere diskriminazio-, bazterketa- eta indarkeria-egoerak bizi dira, milaka pertsonari eragiten dietenak.

Sexu-orientazioa eta genero-identitatea gure autonomia-erkidegoan erregistratutako gorroto-delituen eta gorroto-gertakarien motibazio nagusietako bat dira oraindik ere. Hala ere, gogorarazi behar da datu ofizialek ezagutzen eta erregistratzen diren gertakariak baino ez dituztela jasotzen; izan ere, salaketa gutxiago jartzen direla nabarmena dela aitortu dute gai horretan adituak diren erakundeek eta giza eskubideen aldeko erakundeek. Horregatik, LGTBIfobiaren aurkako borrokak salatutako erasoak jazartzeaz gain, ingurune seguruak sortzea ere eskatzen du, ikusgarritasuna, erakundeekiko konfiantza eta edozein diskriminazio motaren salaketa sustatzeko.

LGTBIQA+ pertsonen aurkako erasoek, mehatxuek, irainek, jazarpen-egoerek eta bestelako indarkeria-adierazpenek ez diete zuzenean jasaten dituztenei bakarrik eragiten: bizikidetza demokratikoa, aukera-berdintasuna eta gizarte libre eta anitz batek izan behar duen aniztasunarekiko errespetua ere arriskuan jartzen dituzte.

Egoera horrek bereziki eragiten die zaurgarritasun handieneko egoeran dauden pertsonei, hala nola trans pertsonei, migratzaileei, arrazializatuei, desgaitasuna dutenei, LGTBIQA+ adinekoei edo gaur egun ere beren identitatea eta sexu-orientazioa askatasunez bizitzeko oztopoak aurkitzen dituzten gazteei.

Trans pertsonek oraindik ere eguneroko bizitzako funtsezko esparruetan eragina duten diskriminazio- eta indarkeria-modu espezifikoei aurre egin behar diete, besteak beste, enplegua eskuratzeko orduan, etxebizitzaren arloan, osasun-arretan edo beren identitatearen gizarte-aitorpenean. Egoera horrek bereziki eragiten die haur eta gazte trans pertsonei, trans migratzaileei eta adineko trans pertsonei; izan ere, askotan

zaurgarritasun- eta bazterketa-egoera larriagoak pairatzen dituzte. Haien duintasuna, segurtasuna eta eskubideak osorik baliatzeko aukera bermatzea erakunde publiko guztien erantzukizun demokratiko saihestezina da.

Horregatik guztiagatik, ekainaren 28 honetan, Podemos Euskadik giza eskubideekin, benetako eta eraginkorra den berdintasunarekin eta LGTBIfobiarik, arrazakeriarik, matxismorik eta bestelako diskriminaziorik gabeko gizarte baten aldeko konpromisoa berresten du.

Aurten, LGTBIQA+ pertsonak zeharkatzen dituzten gorrotoa eta indarkeria mota guztiak aitortu eta haien aurka egiten duen Harrotasuna aldarrikatzen dugu, bereziki matxismoarekin, arrazakeriarekin eta gizarte-bazterketarekin gurutzatzen direnean.

Aurten aldarrikatzen dugu: GORROTOAREN AURREAN, GUZTIONTZAKO ESKUBIDEAK.