Saharar herriak bere burujabetzaren aitortza osoa itxaroten jarraitzen du, RASD aldarrikatu zenetik 50 urte igaro diren honetan

Urteurren esanguratsu honen harira, Podemos Euskaditik berriro ere, irmotasun osoz, saharar herriaren burujabetza osoa aitortzeko eskaria egiten dugu, Marokoren okupazioaren, Espainiaren traizioaren eta nazioarteko geldialdiaren aurrean

PODEMOS EUSKADIREN ADIERAZPENA RASD-REN 50. URTEURRENAREN HARIRA

Espainiako Estatua 1975eko urrian Mendebaldeko Saharako bere kolonia zaharretik atera zenean, saharar herria abandonatuta utzi zuen eta Marokok lurraldea legez kanpo okupatzea ahalbidetu zuen. Erresistentzia ekintza gisa, sahararrek 1976ko otsailaren 27an Saharar Errepublika Arabiar Demokratikoa (RASD) aldarrikatu zuten, estatu burujabe propioa izateko itxaropenari ateak irekiz.

Mende erdi igaro ondoren, erresistentziak jarraitzen du.

Izan ere, mende erdi igaro den honetan, gure lotsarako, RASDk oraindik ez du bere burujabetzaren aitortza osoa; Marokoren legez kanpoko okupazioa pairatzen jarraitzen du, nazioarteko komunitatearen immobilismo konplizearen aurrean; eta saharar herria, bere lurrean libre bizitzeko eskubidea besterik eskatzen ez duena, erbestean eta hondakinen artean bizi da, Tindufeko errefuxiatu-esparruen, eremu askatuen eta Marokoren armadaren bortizkeriaren pean dagoen Sahara okupatuaren artean zatituta.

Ez dugu ahaztu behar Nazio Batuek aitortutako lurralde bati buruz ari garela; hala ere, ez da modu erabakigarrian jarduten herri oso baten aurkako bidegabekeria eta giza eskubideen urraketa honen aurrean, berez burujabe izan beharko lukeen herri baten aurrean.

Eta ez dezagun ahaztu -gure ustez funtsezkoa baita hori gogoratzea- Espainiako Estatuan erantzukizun historiko eta juridiko saihestezina dagoela. Hala ere, sinesgarritasun handiagoa galduz, PSOEk 2022an jarrera-aldaketa etsigarria gauzatu zuen (bere programa propioaren aurkakoa) gatazka honi dagokionez, eta Marokoren “autonomia plana” deiturikoa ontzat eman zuen; horrek Nazio Batuen ebazpenen adostasuna alde batera uztea eta, de facto, Mendebaldeko Saharan dagoen Marokoren okupazio legez kanpokoa balioztatzea dakar.

Bien bitartean, erresistentzia eta duintasunaren adibide, saharar herriak zutik jarraitzen du, basamortuan eskolak eraikiz eta bere nortasuna defendatuz. Okupatzailearen hormen, minen eta espetxeen aurrean, kulturaren, hezkuntzaren eta erresistentzia antolatuaren bidez erantzuten du.

Podemos Euskaditik berriro ere eskatzen dugu berehala amai dadila Marokoren Mendebaldeko Sahararen okupazioa; saharar herriak bere autodeterminazio-eskubide legitimoa gauza dezala; eta bere herrialdearen etorkizunari buruz erabaki dezala, Nazio Batuek ezarritakoaren arabera. Saharar herriak bakarrik erabaki behar du bere etorkizuna, nazioarteko komunitateak babestutako prozesu demokratiko baten bidez.

Halaber, Espainiako eta Eusko Jaurlaritzako gobernuei eskatzen diegu RASDren aitortza osoa, Marokorekin dituzten harreman diplomatiko eta komertzialen etetea, eta erregimen kolonialekin arma-salmenta eta lankidetza militar oro bertan behera uztea.

Gure apustua argia da eta hala izango da beti: nazioarteko zuzenbidean, giza eskubideetan eta herrien elkarrekiko garapenean oinarritutako harremanen alde egiten dugu. Bidegabekeria ereiten badugu, ondorioak herriek pairatzen dituzte eta azkenean mundu osora heltzen dira.

Sahara askea ORAIN!