Elkarrekin Podemosek Gipuzkoako Foru Aldundiari galdetu dio migratzaileen ezohiko erregularizazio-prozesua errazteko abian jarritako zerbitzuei buruz

Gizarte Politiketako diputatu Maite Peñaren premiazko agerraldia eskatu du Batzar Nagusietan, prozedura artatzeko gaitutako espazioak eta baliabideak xehetasunez azal ditzan, gai honen inguruan dagoen informazio faltak kezka eragiten duelako

“Onartezina da izapidetzea ia erabat erakunde gutxi batzuen gaitasunaren menpe egotea, administrazio publiko askok eskaera guztiei behar bezala erantzuteko nahikoa baliabide ezartzen ez duten bitartean”, salatu du Miren Echevestek
 
Elkarrekin Podemosek Gipuzkoako Batzar Nagusietan premiazko agerraldia eskatu du, Zaintza eta Gizarte Politiketako diputatu Maite Peña bertaratu dadin eta Foru Gobernuak migratzaileen erregularizazio-prozesua artatu eta errazteko abian jarritako mekanismoen berri xehetasunez eman dezan.

Zehazki, Elkarrekin Podemosek diputatuari galdetu dio Foru Gobernuak zaurgarritasun-ziurtagiriak eta ezohiko erregularizazio-prozesurako beharrezkoa den gainerako dokumentazioa emateko zer espazio eta baliabide zehatz gaitu dituen. Era berean, agerraldian argitu dadila eskatu du noiztik dauden zerbitzu horiek martxan, udalei beren eskumeneko ezohiko eginkizunak bere gain hartzeko eskatu zaien, eta Aldundiak udalerri guztiek izapidetze berezi hori egiteko beharrezko tresnak izan ditzaten biderik erraztu duen ala ez.

Elkarrekin Podemoseko bozeramaile Miren Echevestek kezka agertu du joan den astelehenean hasi eta ekainaren 30ean amaituko den ezohiko erregularizazio-prozesuaren aurrean Gipuzkoan nola jarduten ari den azaltzen duen informazio argirik ez dagoelako. Ildo horretan, migratzaileei izapideetan laguntzen ari diren gizarte-eragileek erakundeei erantzukizun handiagoa hartzeko eskatu diete.

Izan ere, Gipuzkoako Batzar Nagusiek joan den otsailaren 4an euskal erakundeei eskatu zieten, Elkarrekin Podemosen ekimenez, migratzaileen ezohiko erregularizazio-prozesua erraztu zezaten. Osoko bilkurak ebazpen bat onartu zuen talde guztien babesarekin, PPren aurkako botoarekin salbu, eta bertan berariazko babesa adierazi zitzaion Estatuan Podemosen eta PSOEren artean adostutako migratzaileen ezohiko erregularizazio-prozesuari. Halaber, euskal erakunde guztiei eskatu zitzaien beharrezko neurriak har zitzaten prozesua ahalik eta azkarren eta eraginkortasunez garatzeko, izapide irisgarriak, gardenak eta segurtasun juridiko osoarekin bermatuz.

Ildo berean, testuak Gipuzkoako Foru Aldundiari eta Eusko Jaurlaritzari eskatzen zien, beren eskumenen esparruan eta migrazioaren zein asiloaren arloan lan egiten duten gizarte-erakundeekin batera -arazoaren ezagutza zabala dutenez-, aktiboki lankidetzan jardun zezaten, administrazio-baliabide erabilgarrien bidez sustraitzea egiaztatu eta ziurtatzea erraztuz, eta erregularizazio-prozesurako sarbide eraginkorra lagunduz.

Echevestek ohartarazi du eskubideen eskuragarritasunarekin zuzenean lotutako prozedura baten aurrean gaudela, eta, beraz, “onartezina dela haren izapidetzea ia erabat erakunde gutxi batzuen gaitasunaren, eskuragarritasunaren eta gainkargaren menpe egotea, administrazio publiko askok hain denbora laburrean aurkezten diren eskaera guztiei behar bezala erantzuteko nahikoa baliabide jartzen ez dituzten bitartean”.

Zentzu horretan, azpimarratu du martxoan onartutako proposamenean ezohiko erregularizazio honi babesa emateko beharra onartu ondoren, bai Aldundiak bai Gipuzkoako udalek erantzukizuna dutela prozesu honetan, bulegoak eta langileak gaituz, eta irizpide homogeneoak, irisgarriak eta arinak izango dituzten prozedura argiak ezarriz.

Era berean, Elkarrekin Podemoseko bozeramaileak jardun etikoa ere eskatu die zenbait bulego profesionali eta profesional batzuei, ondoren osatu ezin diren izapideengatik aurretiaz kobratzea saihestuz; izan ere, horrek areagotu egiten ditu berez egoera oso konplexuetan dauden pertsonen babesgabetasuna eta ziurgabetasuna.