Richar Vaquerok EAJren eta PSEren jarrera kritikatu du, eta gizarte eragileei jaramonik ez egitea leporatu die, “erabakiak hartzeko batzordeetan sartzea errefusatu dutelako”
Bizkaiko Batzar Nagusietako Natura Ingurunearen eta Nekazaritzaren Batzordea bildu da gaur, talde politikoek Bizkaiko Toki Eskumeneko Hondakinak Prebenitzeko eta Kudeatzeko 2030erako Plan Integralari (BHPKPI 2030) egindako alegazioak eztabaidatzeko. Saioa bukatu ostean, Richar Vaquero Elkarrekin Podemoseko batzarkideak balorazioa egin du.
“Bozketen zentzua beti bezalakoa izan da: gobernu-taldeko alderdiek proposatutako guztia, beraien gehiengoarekin eta oposizioaren botoekin proposamen batzuetan, onartu egin da; hala ere, guk aurkeztu ditugun bi zuzenketetako bat bera ere ez da onartu”, azaldu du.
Vaquerok adierazi duenez, EAJk eta PSEk hainbat zuzenketa aurkeztu dituzte, batez ere herritarren alegazioetan oinarrituta, hala nola informazioaren argitalpen gardena, digitalizazioa eta zero papera, edo Europar Batasunak ezarritako betetzea. “Gauza normalak dira, eta ezin diegu kontra egin, eta ez diote ezer ekartzen ezagutzen ez dugun planari”, baloratu du.
Elkarrekin Podemosek, zuzenketa baten bitartez, tokiko prebentzio-planak eskatu ditu udalerri guztietan eta mankomunitatean, balizko hondamendi bat gertatuz gero edo erantzukizunak betetzen ez badira esku-hartzea nolakoa izango den argi izateko. “Ezetz bozkatu digute, EAJk eta PSEk esanez udalerri guztietan ezetz, baina begiratuko dutela, agian, zeinetan bai, eta EH Bildu abstenitu egin da, nahiz eta gure proposamena ez zaion oso egokia iruditu”, azaldu du batzarkideak.
“Bigarren zuzenketan, gizarte-eragileak koordinazio-batzordeetan sartzeko aukera aurkeztu dugu, hitza eta botoa izan zitzaten, baina ezezko botoa eman digute”, adierazi du Elkarrekin Podemoseko ordezkariak. “Bitxia da herritarren alegazioak kontuan hartzeaz harro daudenak ez direla gai alegazio horiek egiten dituztenak sartzeko, gizarte-eragileak, alegia. Ez dituzte batzordeetan sartu nahi, erabaki zuzenak har ditzaten”, baieztatu du.
Amaitzeko, Vaquerok adierazi du 8 urte berandu heltzen den plan honek aurrera nola egiten duen kontatzen joango dela. “Atzerapenarekin dator, aurreko legegintzaldietan bi aldiz luzatu ondoren, eta, dirudienez, ez ditu gure proposamenak aintzat hartuko, ezta kolektibo sozial desberdinek egin dituztenak ere”, azaldu du.
PODEMOS Ahal Dugu
