Foru Aldundiaren foru-arauaren proiektuari bost zuzenketa aurkeztu dizkio. Besteak beste, etxebizitzen alokairuaren etekinetan % 70eko salbuespena mugatzea proposatu du, bitartekaritza publikoko programaren batean jarritako etxebizitzetara soilik mugatzeko eta gehienez bost etxebizitza dituzten jabeei bakarrik aplikatzeko
Miren Echeveste foru bozeramaileak ohartarazi du ez dutela inola ere onartuko Bizkaian izapidetzen ari den proiektuan jasotako pribilegio fiskalik, ezta EAJ-PNVren eta PSE-EEren arteko akordioan jasotakorik ere
Elkarrekin Podemosek bost zuzenketa aurkeztu dizkio Gipuzkoako zerga-neurriei buruzko foru-arauaren proiektuari. Besteak beste, ondorengoengatiko kenkaria itzulgarri bihurtzea, etxebizitzen alokairuaren etekinetan aplikatzen den % 70eko salbuespena bitartekaritza publikoko programaren batean jarritako etxebizitzetara mugatzea -eta gehienez bost etxebizitza dituzten jabeei soilik aplikatzea- eta enpleguko pentsio-planentzako onura fiskalak are gehiago handitzea eragoztea dute helburu zuzenketa horiek.
Aurkeztutako zuzenketen artean, ondorengoengatiko kenkaria kuota oso nahikorik ez izateagatik osorik aplikatu ezin denean dagokion zenbatekoa ordaintzea bermatzeko neurriak proposatu ditu Elkarrekin Podemosek. Zehazki, 2026-2030 zergaldietan, zergadunek, horretara behartuta egon ez arren, autolikidazioa aurkezten badute eta autolikidazio horren ondoriozko kuota osoa -edo, hala badagokio, egiten den behin-behineko likidazioarena- nahikoa ez bada ondorengoengatiko kenkaria osorik edo zati batean aplikatzeko, aplikatu gabeko zenbatekoa jasotzeko eskubidea izatea proposatu du.
Elkarrekin Podemoseko bozeramaile Miren Echevesteren arabera, seme-alabek zama ekonomiko handia dakarte gurasoentzat, haien diru-sarreren maila edozein dela ere. Horregatik, fiskalitatea erabili behar da zailtasunak dituzten errenta txikiko familiei laguntzeko; izan ere, familia horiek ahal duten ekarpena egiten dute zuzeneko zergen eta zerga berezien bidez.
Gaur egun, kuota nahikorik ez dutelako errenta-aitorpena aurkeztera behartuta ez dauden pertsonak eta nominan behar besteko atxikipenik ez dutenak kenkari horrek dakarren onuratik eta laguntzatik kanpo geratzen dira. Horregatik, egoera hori zuzendu behar dela uste du alderdiak. Gainera, Gipuzkoak duen jaiotza-tasa txikiaren arazo larria kontuan hartuta, Echevestek azpimarratu duenez, “argi dago gure esku dauden bide guztiak erabili behar ditugula seme-alabak dituzten familiei laguntzeko eta jaiotza-tasa sustatzen laguntzeko”. Horrenbestez, Elkarrekin Podemosentzat funtsezkoa da ondorengoengatiko kenkariari itzulgarritasun-irizpidea aplikatzea.
Elkarrekin Podemosek aurkeztutako zuzenketek etxebizitzen alokairuari lotutako onura fiskalak ere jorratzen dituzte. Horren harira, bozeramaileak azaldu duenez, “zerga-erreforman % 70eko salbuespena ezarri genuen alokairuan jarritako etxebizitzen errententzat, prezioak eremu tentsionatuetako erreferentzia-indizeetara egokitzen zirenean edo etxebizitzak bitartekaritza publikoko programa batean zeudenean. Baina bi desoreka garrantzitsu antzeman ditugu. Batetik, ez genuen mugarik jarri hobari handi hori jasotzen zuen jabearen etxebizitza kopuruari. Bestetik, etxebizitza bat alokairu babestuko programa baten esku jartzeak dakartzan etekinak eta eremu tentsionatuetako alokairuetatik eratorritakoak parekatu genituenean, denok uste genuen erreferentzia-indizeak murriztaileagoak izango zirela. Baina, indizeak argitaratu ondoren, egiaztatu genuen bi kasuetako etekinek ez zutela zerikusirik, erreferentzia-indizeak uste genuena baino askoz handiagoak baitziren. Desberdintasun hori zuzendu egin behar da, bi kasuetako etekinak oso bestelakoak direlako eta ezin zaielako zerga-tratamendu bera eman”.
Horrenbestez, aurkeztutako zuzenketak bi alderdi horiek zuzentzea du helburu. Zehazki, alderdi aurrerakoiaren proposamenaren arabera, alokairuaren errenta bizitegi-merkatu tentsionatuko eremu batean aplikatzen diren erreferentzia-indizeei dagozkien zenbatekoak gainditzen ez dituenean, higiezin bakoitzetik lortutako etekin osoei % 40ko hobaria aplikatuko zaie.
Hobari hori berdin aplikatuko da errentatzaileak bere borondatez ezarritako alokairu-errenta erreferentzia-indizeei dagozkien zenbatekoen barruan geratzen denean. Era berean, hobaria % 70era arte handitzea proposatzen du alderdiak, errenta bitartekaritza publikoko programa baten bidez lortzen denean. Nolanahi ere, neurri horietatik kanpo geratuko dira bost etxebizitza baino gehiagoren jabe diren errentatzaileak.
Zuzenketen bidez, Elkarrekin Podemosek beste neurri bat ere mugatu nahi du: erakunde berritzaile sortu berrien akzioak edo partaidetzak eskuratzeko lortutako zenbatekoa berrinbertitzen denean ondare-irabazien % 100eko salbuespena bi urtetik gora luzatu ahal izatea. Alderdiaren ustez, salbuespena aparteko neurria da berez, eta ezin da denboran gehiago luzatu.
Era berean, Elkarrekin Podemosek enpresek enpleguko pentsio-planetan egiten dituzten ekarpenei buruzko atal bat ezabatzea proposatu du; haren iritziz, ekarpen horiek nahikoa hobari fiskal jasotzen dituzte dagoeneko euskal zerga-sisteman.
“Administrazio publikoak pentsio-sistema mistoa sustatzen ari dira, eta horrek pentsio-sistema publikoa ahultzen du eta genero-arrakala are gehiago sakontzen du; izan ere, sistema horren onuradunen % 70 baino gehiago gizonak dira. Beraz, neurri horiek erretiroaren ondorengo gizonen eta emakumeen arteko arrakala betikotzen laguntzen dute soilik”.
Echevestek gaineratu duenez, “Foru Aldundiak enpleguko BGAEen hobariak are gehiago hobetzea proposatzen duen bitartean -horien onuradun nagusiak errenta ertain-altuko gizonak dira-, guk fiskalitatea erabiltzea proposatzen dugu errenta txikiko ama eta aitei laguntzeko”. Horrela, ondorengoengatiko kenkaria itzulgarri bihurtzeko proposamenari egin dio erreferentzia.
“Ez dugu pribilegio fiskalik onartuko”
Zerga-aldaketei buruzko foru-arauaren proiektua Gipuzkoako Batzar Nagusietan izapidetzeko prozesuari begira, eta Foru Gobernuko bi bazkideek -EAJk eta PSE-EEk- aurkeztuko dituztela iragarritako zuzenketa partzialak direla eta, Echevestek ohartarazi du Elkarrekin Podemosek ez duela inola ere onartuko Bizkaian izapidetzen ari den proiektuan jasotako pribilegio fiskalik, ezta bi alderdien arteko akordioan jasotakorik ere.
PODEMOS Ahal Dugu
